*ಜ್ಯೋತಿ ಸಿ ಕೋಟಗಿ
ಹಾದಿ ಬೀದಿಗಳಲ್ಲಿ ತಿರುತಿರುಗಿ
ಮಾಡುತಿಹರು ಎಲ್ಲರ ಕಾಳಜಿ
ಸಮಸ್ಯೆ ಏನಿದ್ದರೂ ಇವರದೇ ಸರದಿ
ಪರಿಹರಿಸಲು ಸುತ್ತುವರು ಭರದಿ
ಅತೀವೃಷ್ಟಿ, ಅನಾವೃಷ್ಟಿ ಇರಲಿ
ಮಾಹಿತಿ ನೀಡುವರು ಸ್ಪಷ್ಟೀಕರಿಸಿ
ಜನನ ಮರಣಗಳ ಲೆಕ್ಕ
ಮಾಡಿಕೊಡುವರು ಪಕ್ಕ
ಕರೋನ ಭೀತಿ ಇವರಿಗಿಲ್ಲ
ರೋಗಿಗಳ ಆರೈಕೆ ಹೊತ್ತಿರುವರಲ್ಲ
ಪೊಲೀಸ್, ವೈದ್ಯರಿಗೆ ಸಾಥ್ ಕೊಡುವರಲ್ಲ
ಊರಿನವರ ಚಿಂತೆ ತಮ್ಮದನ್ನುವರೆಲ್ಲ
ಗರ್ಭಿಣಿಯರಿಗೂ, ಬಾಣಂತಿಯರಿಗೂ
ಮಕ್ಕಳಿಗೂ, ಹಸುಳೆಗಳಿಗೂ
ಹಿರಿಯರಿಗೂ, ವಯಸ್ಕರರಿಗೂ
ಇವರೇ ಪ್ರಥಮ ವೈದ್ಯರು ಎಲ್ಲರಿಗೂ
ಗುಲಾಬಿ ಉಡುಪಿನ ಇವರು
ಆರೊಗ್ಯ ಯೋಜನೆಯ ಮಾಹಿತಿ ನೀಡುವವರು
ತಿಳಿವಳಿಕೆ ಹೇಳುವ ಸಹೃದಯದವರು
ಮನೆಮನೆಗೆ ಮಾತ್ರೆ ಹಂಚುವ ಮಾತೆಯರು
ಸರಕಾರಿ ಆದೇಶಗಳಿಗೆ ಬದ್ದರಾದವರು
ಬಂದ ಕೆಲಸ ನಿರ್ವಹಿಸಲು ಸಿದ್ದರಾದವರು
ಊರಿನವರಿಗೆ ಪರಮ ಪ್ರಿಯರು
ಈ ನಮ್ಮ ಗುಲಾಬಿ ಸಖಿಯರು
ಇರಲಿ ಇವರ ಬಗ್ಗೆ ನಮಗೂ ಕಾಳಜಿ
ಬಾಗಿಲಿಗೆ ಬಂದಾಗ ಮಾಹಿತಿ ನೀಡಿ ಸಹಕರಿಸಿ
ಕರೋನ ಮಹಾಮಾರಿಗೆ ಎದೆ ತಟ್ಟಿ ನಿಂತಿಹರು
ಇವರಿಗೊಮ್ಮೆ ನಮಸ್ಕರಿಸೋಣ ನಾವೆಲ್ಲರೂ….
