ಬೆಂಗಳೂರು: ನಗರದ ಹೊರವಲಯದ ಪೂರ್ಣಪ್ರಮತಿ ಗುರುಕುಲ, ಆನಂದವನದಲ್ಲಿ ಜನವರಿ 5 ರಂದು ಶ್ರೀ ವಿಶ್ವೇಶತೀರ್ಥರ ದ್ವಿತೀಯ ಮಹಾಸಮಾರಾಧನಾ ಮಹೋತ್ಸವ ಮತ್ತು ಶ್ರೀ ಜಗನ್ನಾಥ ದಾಸರು ಚಲನಚಿತ್ರ ತಂಡದವರಿಗೆ ಸನ್ಮಾನ ಸಮಾರಂಭ ಕಾರ್ಯಕ್ರಮವು ಭೀಮನಕಟ್ಟೆ ಶ್ರೀ ರಘುವರೇಂದ್ರತೀರ್ಥ ಶ್ರೀಪಾದಂಗಳವರ ಸಾನ್ನಿಧ್ಯದಲ್ಲಿ ನಡೆಯಿತು.
ಶ್ರೀ ರಘುವರೇಂದ್ರತೀರ್ಥ ಶ್ರೀಪಾದಂಗಳವರು ತಮ್ಮ ಆಶೀರ್ವಚನದಲ್ಲಿ ಶ್ರೀ ಜಗನ್ನಾಥ ದಾಸರು ಚಿತ್ರದ ತಂಡಕ್ಕೆ ಶುಭಕೋರಿದರು.
ಶ್ರೀ ಜಗನ್ನಾಥದಾಸರು ಚಿತ್ರದ ನಿರ್ಮಾಪಕರು ಮತ್ತು ಶ್ರೀ ವಿಜಯದಾಸರ ಪಾತ್ರಧಾರಿ ತ್ರಿವಿಕ್ರಮ ಜೋಶಿ ಅವರು ಚಿತ್ರದ ಕುರಿತು ಮತ್ತು ತಮಗಾದ ಅನುಭವದ ಕುರಿತು ಮಾತನಾಡಿದರು. ಮುಂದಿನ ದಿನಗಳಲ್ಲಿ ಹರಿದಾಸರ ಇನ್ನು ಹೆಚ್ಚಿನ ಚಿತ್ರಗಳು ಮಾಡುವ ಸಂಕಲ್ಪ ಇರುವುದಾಗಿ ತಿಳಿಸಿದರು.
ಈ ಸಂದರ್ಭದಲ್ಲಿ ಶ್ರೀ ಜಗನ್ನಾಥದಾಸರ ಪಾತ್ರ ನಿರ್ವಹಿಸಿದ ಶರತ್ ಜೋಶಿಯವರು, ಶ್ರೀ ಗೋಪಾಲದಾಸರ ಪಾತ್ರ ನಿರ್ವಹಿಸಿದ ಪ್ರಭಂಜನ್ ದೇಶಪಾಂಡೆಯವರು ಹಾಗು ಜಗನ್ನಾಥದಾಸರ ತಾಯಿ ಪಾತ್ರ ನಿರ್ವಹಿಸಿದ ಪದ್ಮಕಲಾ ಅವರು ಉಪಸ್ಥಿತರಿದ್ದರು. ಎಲ್ಲಾ ಕಲಾವಿದರನ್ನು ನೋಡಿ ಜನರು ಸಾಕ್ಷಾತ್ ದಾಸರುಗಳನ್ನೇ ನೋಡಿದ ಅನುಭವ ವ್ಯಕ್ತಪಡಿಸಿದರು.
ಕಾರ್ಯಕ್ರಮದಲ್ಲಿ ಮೈಸೂರು ರಾಮಚಂದ್ರಾಚಾರ್ಯರು ಮತ್ತು ಶ್ರೀ ಜಗನ್ನಾಥದಾಸರು ಚಲನಚಿತ್ರದ ತಂಡದವರು ಉಪಸ್ಥಿತರಿದ್ದರು.
