ಬೆಂಗಳೂರು: ಇಸ್ಕಾನ್ ಬೆಂಗಳೂರಿನಲ್ಲಿ ಸಂಕ್ರಾಂತಿ ಪ್ರಯುಕ್ತ ಜನವರಿ 14 ರಂದು ಶ್ರೀ ಕೃಷ್ಣ ಬಲರಾಮರ ರಥ
ಯಾತ್ರೆ ಹಮ್ಮಿಕೊಳ್ಳಲಾಗಿತ್ತು.
ಇಸ್ಕಾನ್ ಬೆಂಗಳೂರು 1985 ರಿಂದ ರಥೋತ್ಸವವನ್ನು ಆಚರಿಸುತ್ತಿದೆ ಮತ್ತು ಇದು 38 ನೇ ವಾರ್ಷಿಕ ರಥ ಯಾತ್ರೆಯಾಗಿದೆ. ಶ್ರೀ ವ್ಯಾಸರಾಜ ಮಠದ ಪ್ರಸ್ತುತ ಮಠಾಧೀಶರಾದ ಶ್ರೀ ವಿದ್ಯಾಶ್ರೀಶ ತೀರ್ಥ ಸ್ವಾಮೀಜಿ ಶನಿವಾರ ಸಂಜೆ 5 ಗಂಟೆಗೆ ಕಾರ್ಯಕ್ರಮ ಉದ್ಘಾಟಿಸಿ ಆಶೀರ್ವಚನ ನೀಡಿದರು. ಇಸ್ಕಾನ್ ಬೆಂಗಳೂರಿನ ಅಧ್ಯಕ್ಷರಾದ ಶ್ರೀ ಮಧು ಪಂಡಿತ್ ದಾಸ ಅವರು ಸಭೆಯನ್ನು ಉದ್ದೇಶಿಸಿ ಮಾತನಾಡುತ್ತಾ ತಮ್ಮ ಆಧ್ಯಾತ್ಮಿಕ ಚೈತನ್ಯ ತುಂಬುವ ಮಾತುಗಳಿಂದ ಪ್ರೇರೇಪಿಸಿದರು.
ಸಚಿವ ಕೆ.ಗೋಪಾಲಯ್ಯ ಉಪಸ್ಥಿತರಿದ್ದರು.
ಮೆರವಣಿಗೆಯು ಇಸ್ಕಾನ್ ಬೆಂಗಳೂರು, ರಾಜಾಜಿನಗರದಿಂದ ಪ್ರಾರಂಭವಾಯಿತು, ಪ್ರಮುಖ ರಸ್ತೆಯ ಮೂಲಕ ಹತ್ತಿರದ ಸ್ಥಳಗಳಿಗೆ ತೆರಳಿ ದೇವಸ್ಥಾನಕ್ಕೆ ಮರಳಿತು. ಮೃದಂಗ ಮತ್ತು ಕರತಾಳಗಳ ದಿವ್ಯ ಕಂಪನಗಳ ಜೊತೆಯಲ್ಲಿ ರಸ್ತೆಗಳು ಮೋಹಕ ಕೀರ್ತನೆಗಳಿಂದ ಪ್ರತಿಧ್ವನಿಸಿದವು.
